WES-KAAP. – Die polisie het Sondagaand omstreeks 22:30 ná ‘n hoëspoedjaagtog op die N2 naby die Knysna- provinsiale hospitaal op dwelms met ‘n geraamde straatwaarde van R470 000 beslag gelê. Twee verdagtes, onderskeidelik 43 en 49 jaar oud, is in hegtenis geneem en verskyn vandag op aanklagte van dwelmhandel in die Knysna-landdroshof.
Luidens die Tuinroete-polisiewoordvoerder, sers. Christopher Spies, was misdaadvoorkomingsbeamptes met strategiese patrollies in die sentrale sakekern besig, toe hulle ‘n verdagte voertuig in Mainstraat opmerk. Toe die beamptes die voertuig nader, het dit weggejaag. Ná ’n jaagtog is die voertuig tot stilstand gebring en ’n soektog het twee groot pakkies met 58,85 kilogram dagga in die agterkant van die voertuig blootgestel.
Die polisie het ook op drie selfone, ’n skaal en ’n onbekende bedrag geld beslag gelê. Die waaksaamheid van die misdaadvoorkomingsbeamptes is geprys.
