WES-KAAP. – ‘n Man van Groot Brakrivier se bakkie het Dinsdag van ‘n krans af by die berugte Voëlklip, in Heroldsbaai, George, in die see gestort. Hy is omstreeks 23:00 as vermis aangemeld. Nooddienste is tans op die toneel waar ‘n soek-en reddingsoperasie aan die gang is. Dit is nog onseker of die man leef.
AO Christopher Spies sê aan Nuusflits die man het Dinsdagmiddag sy huis verlaat en het nie weer teruggekeer nie. ‘n Soektog is dadelik van stapel gestuur. Dit het die polisie na Voëlklip gelei, maar weens gure weersomstandighede was die pad onbegaanbaar.
Nooddienste wat polisieduikers, soek-en reddingsdienste, George munisipale-brandweer en verkeer insluit, het volgens Spies vanoggend na Voëlklip teruggekeer.
