KWAZULU-NATAL. – Spanning tussen plaaslike inwoners en buitelanders het Vrydag in Estcourt oorgekook toe ‘n skare ses winkels wat aan buitelandse burgers behoort, geplunder het. Die polisie het die situasie egter vinnig onder beheer gekry en geen beserings is aangemeld nie.
Volgens polisiewoordvoerder, kol. Robert Netshiunda, word vermoed die plundering is ‘n reaksie op ‘n hofaansoek wat buitelandse burgers onlangs teen die burgemeester ingestel het. Om ‘n blywende oplossing te vind, is ‘n vergadering vir vanmiddag tussen die burgemeester se kantoor, die polisie en die eienaars van die geboue waarin die geplunderde winkels geleë is, gereël. Polisieteenwoordigheid word in die gebied gehandhaaf terwyl verdere ondersoeke aan die gang is.
Die voorval kom te midde van breër onstabiliteit in die provinsie. Genl.maj. Phumelele Makoba, die waarnemende provinsiale kommissaris, hou om 14:00 ‘n mediakonferensie by die polisie se provinsiale hoofkantoor in Durban. Vrae oor die beplande optog deur die All Truck Drivers Forum (ATDF) wat Saterdagoggend plaasvind, sal beantwoord word, asook oor die reeks optogte regoor die provinsie wat gekenmerk word deur anti-buitelandse sentimente.
