GAUTENG. – Drie verdagtes is dood nadat hulle na bewering op polisielede geskiet het tydens ’n operasie by die Buccleuch-wisselaar in Gauteng.
Kol. Dimakatso Nevhuhulwi, polisiewoordvoerder, sê wetstoepassers het opgetree nadat inligting ontvang is oor ’n groep mans wat in verskeie voertuie rondbeweeg het en vermoedelik met die sogenaamde Rolex-bende verbind word. Beamptes van die taktiese reaksiespan het een van die voertuie op die N3 geïdentifiseer en probeer stop. Die bestuurder het egter weggejaag, waarna ’n hoëspoed-agtervolging gevolg het.
Volgens die polisie het die insittendes tydens die jaagtog op beamptes losgebrand, wat tot ’n skietgeveg gelei het. Bykomende ondersteuning is ontbied van die provinsiale teen-bende-eenheid, die Gauteng-verkeerslugvleuel en private veiligheidsmaatskappye. Die voertuig het uiteindelik op die Buccleuch-wisselaar tot stilstand gekom. Die drie verdagtes is op die toneel dood aangetref. Twee handwapens is in die voertuig gevind.
Terwyl ondersoekers nog op die toneel gewerk het, is ’n tweede voertuig wat deel van die ondersoek was, opgemerk en voorgekeer. Die bestuurder is in hegtenis geneem en sal na verwagting van sameswering om roof te pleeg, aangekla word. Die polisie sê die suksesvolle operasie beklemtoon die waarde van samewerking tussen die SAPD, ander wetstoepassingsagentskappe en private veiligheidsrolspelers in die bekamping van ernstige misdaad.
