GAUTENG. – Drie mans van Lesotho het in die Johannesburg-landdroshof verskyn in verband met ’n massaskietery in Cleveland waarin 13 mense dood en 14 ander beseer is. Molebeli Mosia (34), Ramonne Tsibela (32) en Zipho Metsing (26), staan tereg op aanklagte van moord en poging tot moord.
Magaboke Mohlatlole, NVG-woordvoerder, sê die voorval het op 9 Junie by die Jumpers- informele nedersetting plaasgevind, waar gewapende mans glo lukraak op inwoners losgebrand het. Volgens die NVG is die drie ná ‘n uitgebreide polisie-ondersoek in hegtenis geneem. Oorlewendes is in die hospitaal besoek waar verklarings geneem is. Ná hul ontslag het hulle die verdagtes by die MaiMai-informele nedersetting uitgewys, wat tot die inhegtenisneming gelei het.
Die saak is vir adresverifikasie en om die borgtogaansoek te reël tot 2 Julie uitgestel. Die beskuldigdes bly in aanhouding terwyl die saak voortgaan.
