ARGENTINIË. – ‘n 22-jarige studentevlieënier is geloof nadat sy ‘n opleidingsvliegtuig veilig geland het nadat haar vlieginstrukteur na bewering tydens die vlug uit die vliegtuig gespring het.
Volgens Argentynse owerhede het die student en die 42-jarige vlieginstrukteur, Leandro Andrés Bertazzo, op ‘n opleidingsvlug in ‘n Cessna C-150 vanaf Coronel Olmedo-lughawe in die provinsie Córdoba vertrek. Wat as ‘n gewone opleidingsvlug begin het, het egter in ‘n tragedie geëindig. Volgens die student se verklaring aan ondersoekers het Bertazzo tydens die vlug sy koptelefoon afgehaal, sy selfoon en ander persoonlike besittings netjies op die instrumentepaneel neergesit en sy veiligheidsgordel losgemaak. Sy beweer hy het daarna die vliegtuig se deur oopgemaak – wat volgens haar moeilik is om tydens ‘n vlug te doen – en daarna na haar gedraai voordat hy gesê het: “You know what to do. Keep moving forward.” Daarna het hy na bewering uit die vliegtuig gespring.
Die student het daarin geslaag om kalm te bly. Sy het die Cessna veilig na die vliegveld teruggevlieg en ‘n suksesvolle landing gedoen voordat sy die owerhede van die voorval verwittig het. Reddingspanne het Bertazzo se liggaam sowat 20 minute later in ‘n landelike gebied naby Toledo gevind. Hy is op die toneel dood verklaar.
Eduardo Álvarez, direkteur van die Flying Parrot Córdoba-vliegskool waar Bertazzo werksaam was, het die student geloof vir haar buitengewone kalmte en professionaliteit. Hy het gesê sy was sigbaar geskok, maar het ondanks haar beperkte vliegervaring foutloos opgetree en die vliegtuig veilig laat land. Die ondersoek het aanvanklik gefokus op die moontlikheid van ‘n tegniese fout met die vliegtuig of sy deur. Volgens die student se verklaring en die bewyse wat tot dusver ingesamel is, ondersoek die owerhede die voorval tans as ‘n vermoedelike selfdood. Ondersoekers bestudeer ook die vliegtuig se onderhoudsrekords, die vliegskool se dokumentasie en kommunikasie tydens die vlug.
Bronne: TN Argentina, La Nación Argentina, Infobae Argentina, Flying Parrot Córdoba (verklaring deur Eduardo Álvarez), The Mirror, Daily Mail
