Die Suid-Afrikaanse gesondheidsprodukte-reguleringsowerheid (SAHPRA), die Suid-Afrikaanse Aptekersraad (SAPC) en die raad vir gesondheidsberoepe van Suid-Afrika (HPCSA) waarsku die publiek, apteke en mediese praktisyns om nie die herroepte produkte iDEXIS-semaglutied, iDEXIS-tirzepatied en iDEXIS-semaglutied/tirzepatied te gebruik, voor te skryf of te versprei nie.
SAHPRA het die betrokke produkte reeds in Junie 2026 herroep nadat vasgestel is dat dit ‘n ernstige veiligheidsrisiko vir pasiënte inhou. Die voortgesette gebruik, voorskryf of verspreiding daarvan kan gebruikers se gesondheid in gevaar stel. Semaglutied en tirzepatied word hoofsaaklik gebruik vir die behandeling van tipe 2-diabetes en word ook in sekere gevalle voorgeskryf om gewigsverlies te ondersteun.
Die huidige waarskuwing het egter spesifiek betrekking op die herroepte iDEXIS-produkte en nie op alle medisyne wat dié aktiewe bestanddele bevat nie. Volgens die owerhede is die herroeping as ‘n Klas I, Tipe A-herroeping geklassifiseer, wat beteken dat die produkte ‘n ernstige risiko vir pasiënte inhou. Gesondheidswerkers wat die herroepte produkte steeds voorskryf, versprei of in voorraad hou, kan dissiplinêr vervolg word ingevolge toepaslike wetgewing, insluitend die wet op medisyne en verwante stowwe.
Die gesondheidsowerhede doen ‘n beroep op alle apteke, mediese praktisyns en lede van die publiek om seker te maak dat die herroepte produkte nie meer gebruik of versprei word nie. ‘n Volledige lys van die betrokke produkte is in SAHPRA se herroepingskennisgewing beskikbaar.
