GRIEKELAND. – Twee bemanningslede is Sondag dood nadat twee brandbestrydingshelikopters in die lug gebots het. Hulle was besig om ’n groot veldbrand in die Psatha-gebied, wes van Athene, te bestry.
Volgens die Griekse brandweer het die twee gehuurde Bell-helikopters, met altesaam vier persone aan boord, tydens die lugoperasie gebots. Twee bemanningslede het omgekom, terwyl die ander twee na ’n hospitaal geneem is.
Die ongeluk het plaasgevind terwyl brandbestryders probeer het om ’n veldbrand in Attika, wat deur sterk winde aangeblaas is, onder beheer te bring. Noodspanne het op verskeie fronte gewerk. Die twee helikopters was volgens berigte deur die Griekse brandweer gehuur en het vanaf Elefsina opgestyg vir die bestryding van die brand.
Ondersoek word ingestel na die omstandighede wat tot die botsing gelei het.
Bronne: Al Jazeera, ABC News, Anadolu, Mercopress
