NOORDWES. – Chrisi Pretorius, ‘n gr. 8-leerling van Hoërskool Rustenburg, is oorlede dae nadat sy ‘n beroerte gehad het.
Chrisi is op 29 Julie in die intensiewesorgeenheid opgeneem nadat sy ’n beroerte gehad het. Haar familie en die Rustie-gemeenskap het sedertdien gehoop op haar herstel, met die skool wat die gemeenskap gevra het om vir haar te bid. Die skool het egter Sondag bevestig dat Chrisi oorlede is en medelye met die Pretorius-familie, haar vriende en almal in die skoolgemeenskap betuig.
Chrisi sal as ’n geliefde lid van die Rusties deur die skoolgemeenskap onthou word.
Nadia Lombard het ook die nuus van Chrisi se afsterwe op BackaBuddy bekend gemaak. Volgens die BackaBuddy-inskrywing het Chrisi aanvanklik ná ’n val tuis herstel, maar haar toestand het sowat ’n week later skielik versleg. Sy is terug na die hospitaal geneem, waar dokters vasgestel het dat die val deur ’n beroerte veroorsaak is. Chrisi is daarna in die intensiewesorgeenheid opgeneem. Die familie het nie mediesefondsdekking gehad nie en het gedurende haar hospitalisasie met toenemende mediese koste te kampe gehad. Lombard het tydens Chrisi se hospitalisasie ’n beroep op die publiek gedoen om die familie finansieel te ondersteun en vir Chrisi en haar geliefdes te bid.
Rustie veg ná beroerte vir haar lewe
