KWAZULU-NATAL. – Twee mans wat daarvan beskuldig word dat hulle by ’n huis in die Nthomba-gebied probeer inbreek het, is Sondag ernstig beseer nadat hulle glo deur gemeenskapslede aangeval is. Een van die mans is glo later aan sy beserings oorlede, maar dit kon nog nie bevestig word nie.
Reaction Unit South Africa (Rusa) is na die toneel ontbied, waar een van die mans langs die pad aangetref is met ernstige beserings aan sy gesig. Die tweede man is in sy woning gevind met beserings aan sy linkerhand, ’n kopbesering en ’n snywond onder sy regterelmboog.
Volgens gemeenskapslede is die twee opgeneem op kringtelevisiebeeldmateriaal toe hulle na bewering probeer het om by ’n huis in te breek. Die inwoner het alarm gemaak, waarna lede van die gemeenskap volgens Rusa gemobiliseer het en die twee mans aangekeer en aangerand het. Die mans is glo tydens die aanval van hul klere gestroop, waarna dit aan die brand gesteek is.
Rusa-beamptes is later meegedeel dat een van die mans weens sy beserings oorlede is. Dit kon egter nie onmiddellik bevestig word nie.
