Meer foto’s in berig.
LIMPOPO. – Die Valke het op dwelms en laboratoriumtoerusting met ‘n geraamde straatwaarde van R600 miljoen op ‘n plaas in Musina beslag gelê. Twee Mexikane, twee Zimbabwiërs en een Malawiese burger is in hegtenis geneem nadat wat vermoedelik ‘n kristalmetamfetamien-laboratorium is, ontdek is.
Die plaas is tussen reservate, wildsreservate en nie ver van ‘n landingstrook nie, geleë.
Die Valke se woordvoerder, kol. Avele Fumba, sê die beslaglegging het ’n groot knou aan die dwelmbedryf toegedien. Die intelligensiegedrewe operasie is na ‘n twee maande lange ondersoek laat Donderdagaand, uitgevoer. Buiten die dwelms en toerusting is daar ook op ‘n onbekende bedrag kontant beslag gelê. Dit is die derde klandestiene dwelmlaboratorium wat in Limpopo gesluit is.
Die verdagtes sal na verwagting Maandag op aanklagte wat verband hou met die vervaardiging en besit van onwettige dwelms in die Musina-landdroshof verskyn. Verdere aanklagte kan moontlik bygevoeg word.
