GAUTENG. – ‘n Man (86) het Sondagaand kort voor 21:00 gesterf toe hy besig was om ‘n band langs die N1 in ‘n suidelike rigting naby Zambesi-rylaan (Sefako Makghato-rylaan) te ruil en deur ‘n verbygaande voertuig teen ‘n hoë snelheid getref is.
Pretoria Volunteer Medical Services (PVES) sê noodpersoneel van verskeie dienste het hulle na die toneel gehaas. Die bejaarde man het ernstige beserings opgedoen. Paramedici het intensiewe lewensreddende behandeling toegepas en hom gestabiliseer voordat sy toestand versleg het. Hy is daarna geïntubeer en kardiopulmonêre resussitasie (KPR) is begin. Ondanks volgehoue pogings om sy lewe te red, is hy op die toneel dood verklaar.
PVES het die dienste wat op die toneel teenwoordig was, insluitend Netcare911 en Gauteng Emergency Medical Services, wat gesorg het dat ‘n span hoogopgeleide mediese nooddienspersoneel na die pasiënt omsien, bedank. IER Integrated Emergency Respons en Ecomed Medical is vir spanwerk saam met die ander dienste bedank.
Tshwane-metropolisie en die polisie was op die toneel teenwoordig. PVES het hul medelye teenoor die oorledene se naasbestaandes uitgespreek.
