STELLENBOSCH – Suid-Afrika het die FISU sewes Stellenbosch met goud gekroon ná ’n oortuigende 34–7-oorwinning oor Uganda in die manseindstryd by die Danie Craven-stadion.
Die FISU World University Championship Rugby Sevens is van 4 tot 6 September aangebied – die eerste keer dat Suid-Afrika hierdie wêreldkampioenskap huisves. Byna 200 student-atlete uit 14 lande het aan die driedaagse toernooi deelgeneem, met 17 spanne – nege mans- en agt vrouespanne – wat om die gesogte wêreldtitels meegeding het.
Die deelnemende lande was Suid-Afrika, Japan, Australië, Kanada, Frankryk, Ierland, die Verenigde State, Argentinië, Uganda, Zimbabwe, Chili, Mexiko, Noorweë en Botswana.
Suid-Afrika koning van universiteits-sewes
Vir die Suid-Afrikaanse manspan was die naweek die perfekte geleentheid om die silwermedalje van die vorige kampioenskap in Frankryk op te volg. Die tuisspan het nie teleurgestel nie.
Suid-Afrika het sy groepwedstryde onoorwonne afgesluit en daarna met selfvertroue deur die uitspeelfase beweeg. Oorwinnings oor Noorweë en Chili het die gasheer ’n plek in die halfeindronde besorg, waar Japan uitgeskakel is. In die eindstryd het die Suid-Afrikaners hul geleenthede benut en uiteindelik met 34–7 geseëvier.
Die wedstryd was ook histories, aangesien dit die eerste keer was dat twee Afrikalande om die mansgoud in die FISU-rugbysewes-kampioenskap meegeding het. Uganda moes met die silwermedalje tevrede wees.
Kanada steek Frankryk die loef af
In die vrouekompetisie was dit Kanada wat die goue medalje verower het. Die Kanadese het Frankryk met 20–0 in die eindstryd geklop om die wêreldkampioenskapstitel aan te gryp, terwyl Frankryk teen die verwagting in met silwer tevrede moes wees.
Die vrouekompetisie het ’n sterk internasionale veld gehad, met onder meer die verdedigende kampioen Japan, Australië, Kanada, Frankryk, die Verenigde State, Ierland, Botswana en gasheer Suid-Afrika. Kanada se pad na die eindstryd het onder meer deur ’n oorwinning oor Suid-Afrika in die uitspeelfase geloop. Australië, Japan, Kanada en Frankryk het die halfeindronde gehaal.
FISU sewes Stellenbosch bou dorp se sportnaam uit
Die kampioenskap was egter veel meer as net ’n stryd om medaljes. Die Danie Craven-stadion, met sy ryk rugbygeskiedenis en verbintenis aan Maties Rugby, was ’n gepaste verhoog vir die toernooi. Die Universiteit Stellenbosch huisves sowat 31 000 studente en Maties Rugby se geskiedenis strek oor meer as 150 jaar.
Vir die jong spelers het die naweek boonop ’n waardevolle geleentheid gebied om hul talente teen van die beste universiteits-sewespelers ter wêreld te toets. Die kampioenskap het uiteindelik gelewer wat daarvan verwag is: vinnige rugby, internasionale mededinging en ’n fees van universiteitsport – met Suid-Afrika wat voor eie ondersteuners die grootste prys ingepalm het.
Die toernooi het saamgeval met ’n vol Suid-Afrikaanse rugbynaweek, waarin die Springbokke die All Blacks met 29–22 geklop het om ’n 2–1-reeksvoorsprong te neem.
Goue medaljewenners
- Mans: Suid-Afrika wen Uganda 34–7
- Vroue: Kanada wen Frankryk 20–0
Berig en foto: Johan Maree – aXn Shots. Meer foto’s beskikbaar by aXn Shots.
