WES-KAAP. – Jeanet Mokoena (23), ’n honneursstudent in linguistiek aan die Universiteit van Wes-Kaapland (UWK), het stamselle geskenk aan ’n Amerikaanse man in sy 50’s wat aan leukemie ly. Mokoena het vroeg in 2025 tydens ’n bewusmakingsveldtog op die kampus as stamselskenker geregistreer. Sy het eers vroeg in 2026 gehoor dat sy ’n geskikte skenker vir die pasiënt is.
Toe die internasionale organisasie DKMS haar vra of sy bereid sou wees om te skenk, het sy sonder huiwering ingestem. Palesa Mokomele, hoof van korporatiewe aangeleenthede en kommunikasie by DKMS Africa, sê een van die grootste wanopvattings oor stamselskenking is dat dit ’n skenker se langtermyn-gesondheid negatief kan beïnvloed. Volgens haar vervaardig die liggaam natuurlik nuwe bloedvormende stamselle en begin die aanvulling kort ná skenking, met vlakke wat gewoonlik oor die daaropvolgende dae tot weke na normaal terugkeer.
Mokoena, wat in Vanderbijlpark grootgeword het, sê die hulp wat sy as kind van bure, gemeenskapslede en onderwysers ontvang het, het haar geleer hoe belangrik dit is om ander mense te help, selfs wanneer jy hulle nie ken nie. Onderwysers het onder meer saamgestaan om haar buskaartjie en ander benodigdhede te betaal toe sy ’n plek by UWK gekry het.
DKMS werk saam met verskeie onderwysinstellings, waaronder UWK, om jongmense aan te moedig om as stamselskenkers te registreer. Jonger skenkers word dikwels deur behandelende dokters verkies omdat dit beter oorplantingsuitkomste het. Suid-Afrika het ’n tekort aan geregistreerde skenkers uit verskillende gemeenskappe, veral swart, bruin en Indiërgemeenskappe.
’n Pasiënt se kans om ’n geskikte skenker te kry, is groter wanneer daar genetiese ooreenkomste is. Mokoena sê die mediese toetse, inspuitings en ongeveer ses uur lange stamselversamelingsprosedure was vir haar ’n klein opoffering in vergelyking met wat dit vir die pasiënt en sy familie kan beteken. Sy hoop om uiteindelik tot op PhD-vlak te studeer.
Druk hier om meer te lees.
