GAUTENG. – Die polisie het van Julie tot September 2026 landwyd 5 590 moorde aangeteken, 204 minder as in dieselfde kwartaal verlede jaar.
Firoz Cachalia, waarnemende minister van polisie, sê die syfer kom neer op gemiddeld sowat 60 moorde per dag. Hy het Vrydag in Pretoria die misdaadstatistiek vir die tweede kwartaal van die 2026/27-boekjaar bekendgemaak. Die Oos-Kaap het die hoogste moordsyfer per inwoner aangeteken, gevolg deur die Wes-Kaap en KwaZulu-Natal.
Motorkapings het met 16,8% afgeneem en vragmotorkapings met 27,9%. Huisroof en sakeroof het elk met 7% afgeneem, terwyl aangemelde seksuele misdrywe met 2,7% gedaal het. Genl. Fannie Masemola, nasionale polisiekommissaris, sê Operasie Shanela het in dieselfde kwartaal tot 222 441 inhegtenisnemings gelei.
Bronne: Firoz Cachalia, SAnews, Genl. Fannie Masemola