GAUTENG. – “Ons vra om verskoning vir enige verwarring of kommer wat dit mag veroorsaak het.”
Die departement van onderwys in die provinsie het sy vorige verklaring oor a-pokke, van ‘n gr. 1-leerder van die Primêre Skool Iketleng in Hammanskraal teruggetrek.
“Dit het onder ons aandag gekom dat die resultate rakende die vermoedelike a-pokke-geval eers deur die Nasionale Instituut vir Oordraagbare Siektes (NIOS) en die gesondheidsdepartement geverifieer moet word. Ons erken dat die aankondiging van enige bevestigde gevalle deur die NIOS en die gesondheidsdepartement gemaak moet word nadat deeglike toetsing en verifiëring plaasgevind het,” sê Steve Mabona, woordvoerder vir die departement.
Mabona sê die vorige verklaring is na amptelike korrespondensie deur die skool ontvang, gemaak.
“Dit blyk egter dat ons dalk voortydig opgetree het om die saak te bevestig sonder om op die finale verifikasie van die NIOS te wag.”
Mabona sê die departement is daartoe verbind om te verseker dat akkurate en geverifieerde inligting aan die publiek gegee word. Die amptelike verifiëring van die NIOS word afgewag, voordat enige verdere aankondigings oor die geval gemaak sal word.
“Ons waardeer die begrip en geduld van ons skoolgemeenskappe terwyl ons deur hierdie situasie werk. Die gesondheid en veiligheid van ons leerders en personeel bly ons hoogste prioriteit, en ons sal voortgaan om nou saam te werk met gesondheidsowerhede om akkurate inligting en toepaslike leiding te verskaf.”
Nuusflits het vroeër berig:
‘n Gr. 1-leerder van Laerskool Iketleng in Hammanskraal, noord van Pretoria, is Dinsdag as die eerste geval van a-pokke by ‘n leerder van ‘n skool aangemeld.
Steve Mabona, woordvoerder vir onderwys in die provinsie, sê die leerder het simptome gehad en is deur haar ouers na ‘n hospitaal geneem.
“Volgens inligting tot ons beskikking het die leerder die afgelope naweek familie in Boplaas besoek en dit word beweer van die familielede het simptome van a-pokke getoon.”
Mabona sê die leerder is terug huis toe en het jeukende sere ontwikkel. Sy is Maandag na ‘n hospitaal geneem waar a-pokke gediagnoseer is. Sy is saam met haar familie in afsondering waar sy medies versorg word.
“Die Gautengse departement van onderwys, in samewerking met die Gautengse departement van gesondheid, sal onmiddellik alle nodige protokolle inisieer om die situasie te beperk en verdere verspreiding te voorkom. Die Geïntegreerde Skoolgesondheidsprogram (ISHP)-span sal die skool besoek om intensiewe gesondheidsopvoeding en sifting te verskaf.”
Mabona herinner die infeksie steek viraal aan deur direkte kontak met ‘n geïnfekteerde persoon of item. Hy sê voorts die risiko vir skoolgemeenskappe is laag, maar doen ‘n beroep dat kinders goeie higiëne moet uitoefen. Individue wat siek is, moet liefs vermy word.
Matome Chiloane, die LUR, sê: “Ons verstaan dat hierdie ontwikkeling kommer kan wek, maar ons verseker die publiek dat ons die situasie met die hoogste vlak van sorg hanteer. Die gesondheid en veiligheid van ons skoolgemeenskappe is ons topprioriteite, en ons werk ywerig saam met gesondheidsowerhede om dit te bestuur. Ons doen ‘n beroep op alle ouers en voogde om saam te werk met gesondheidsriglyne en om enige vermoedelike simptome van a-pokke stiptelik by gesondheidsorgverskaffers aan te meld. Kom ons verseker die veiligheid en welstand van ons leerders en personeel.”
