GAUTENG. – ‘n Politikus van Action SA en ‘n vroulike kollega is gisteraand net voor middernag na ‘n kaping en ontvoering in Olievenhoutbosch, Pretoria veilig met hulle families herenig.
Action SA het gisteraand gesê Funzi Ngobeni, die Gautengse provinsiale voorsitter, en Hluphi Gafane, die voorsitter van die jeugforum, was die slagoffers van ‘n kaping en ontvoering. Daar is gevra om ‘n foto van die voertuig vir die doeleindes van die soektog te versprei. Na die opsporing van die twee persone het die politieke party gevra hulle moet privaat tyd met hulle families gegun word.
Brig. Brenda Muridili sê die slagoffers is omstreeks 20:00 gekaap en ontvoer. Hulle is veilig in Benoni gevind.
Olievenhoutbosch-polisie het ‘n klagte ontvang en het dadelik die nodige rolspelers gemobiliseer. Die polisie se opsporingspan, georganiseerde misdaadondersoek, Matrix-voertuigopsporingsmaatskappy, sowel as ‘n Netstar-helikopter, is ingespan.
Die slagoffers is na bewering gekaap en in hulle Toyota Hilux gedwing. Hulle is in Benoni afgelaai.
Die voertuig en verdagtes word nog gesoek.
