MPUMALANGA. – Agt persone het gesterf en nog drie is in die hospitaal opgeneem nadat daar Saterdagoggend omstreeks 04:00 in Pienaar, Mpumalanga, op hulle geskiet is.
Brig. Donald Mdhluli en lt.kol. Jabu Ndubane sê die polisie ondersoek die motief van die insident waartydens aanvanklik vyf mans en een vrou op die toneel doodgeskiet is. Nog ‘n man en ‘n vrou het later in ‘n hospitaal aan beserings gesterf. Buiten die sterftes is twee mans en ‘n vrou vir mediese behandeling in ‘n hospitaal opgeneem.
Twee VW Polo-voertuie met koeëlgate, liggame op die grond en ‘n oorledene in ‘n voertuig is op die toneel aangetref.
‘n 72-uur-aksieplan is in werking gestel om die insident te ondersoek en die skuldiges op te spoor.
