VSA. – Die Withuis het gedreig om federale werkers binne twee dae te begin afdank tydens ‘n regeringsluiting wat gister begin het. Honderdduisende federale werknemers word in die geval van ‘n regeringsluiting huis toe gestuur.
Lees ook: Gasa-flottielje deur Israeliese vloot gekeer
Die sluiting het begin nadat Republikeine en Demokrate in die regering nie teen middernag ‘n dooiepunt oor die begroting kon oplos nie.
Die Republikeine en Demokrate blameer mekaar vir die sluiting en die vise-president JD Vance en perssekretaris Karoline Leavitt het gesê die Demokrate “speel politieke speletjies”.
Leavitt het gesê massa-afdankings kan binne twee dae plaasvind en het gesê “die Demokrate het ons in hierdie posisie gesit”.
Chuck Schumer, Demokraat in die Senaat, het die Republikeine daarvan beskuldig dat hulle die Demokrate boelie om die begroting te moet aanvaar.
Demokrate wil waarborge oor gesondheidsbefondsing hê voor hulle instem tot ‘n uitgaweplan, terwyl Republikeine ‘n tydelike stop-gap-maatreël wil gebruik om die regering tot middel November met befondsing op die huidige vlak oop te hou.
Daar sal na verwagting weer Vrydag vir die korttermyn-befondsingswet soos deur die Republikeine voorgestel, gestem word.
Bronne: BBC, The Independent, USA Today
