AUSTRALIë. – ‘n Man van Nieu-Suid-Wallis is die eerste in die wêreld om met ‘n kunsmatige hart van titanium na 100 dae uit ‘n hospitaal ontslaan te word. Hy het intussen ‘n skenkerhart ontvang.
Die man in sy 40’s het die ses uur inplanting in November in die St. Vincent-hospitaal in Sydney ondergaan. Voordat hy met sy nuwe hart ontslaan is, was hy vir weke in die intensiewesorgeenheid, voordat hy nog weke lank in ‘n algemene saal waargeneem is. Hy het vroeg in Maart ‘n skenkerhart ontvang en dit maak hom die persoon wat die langste met ‘n kunsmatige hart vir ‘n skenkerhart gewag het.
Die titanium kunsmatige hart wat deur Bivacor ontwerp is, is om pasiënte aan die lewe te hou terwyl vir ‘n skenkerhart gewag word. Dit gebruik ‘n pomp om hartfunksies te verrig. Dr. Taniel Timms, die uitvinder van die hart, het gesê hy is trots op die vordering in tegnologie.
Dr. Paul Jansz van St. Vincent-hospitaal het gesê dit is vir hom ‘n voorreg om deel van die operasie te kon wees, aangesien hartversaking elke jaar byna 5 000 Australiërs se dood veroorsaak.
Foto: Bivacor
Bronne: 9 News, St. Vincents Hospital Sydney, Bivacor en CNN
