KWAZULU-NATAL. – Die bestuurder (33) van ‘n bakkie was na bewering Sondag amper die slagoffer van vermeende kapers. Tydens die vlugtog het die bakkie bo op ‘n motorafdak beland.
Reaction Unit South Africa sê twee reaksiebeamptes is omstreeks 15:50 na Missionlands om ‘n verdagte wit Isuzu-bakkie te ondersoek. Die bakkie is gevind waar hy in Missal Circle eers bo-op ‘n motorafdak beland het en toe daardeur is. Die bestuurder van die bakkie en die passasier (30), wat agt maande swanger is, het slegs geringe beserings opgedoen.
Na bewering het die bestuurder gestop om homself te verlig toe die verdagtes hom genader het in ‘n oënskynlike poging om hom te kaap. Die ongeluk het gebeur toe die bestuurder probeer vlug het.
Geen besonderhede van die verdagte voertuig, vuurwapens of beskrywing van die beweerde verdagtes kon verskaf word nie.
