GAUTENG. – Twee lyfwagte van die burgemeester van die Madibeng- plaaslike munisipaliteit het Maandag vlugtig op aanklagte van moord en regsverydeling in die Pretoria-landdroshof verskyn. Michael Swanton, ‘n lugmagsersant, is tydens die beweerde voorval doodgeskiet.
Lumka Mahanjana, NVG-woordvoerder, sê in ‘n verklaring Thabang Eugene Sohole (41) en Michael Makampe (42) staan tereg in verband met ’n voorval wat na bewering op 28 Januarie omstreeks 20:00 plaasgevind het. Volgens die staat het die oorledene en sy vrou, albei lede van die Suid-Afrikaanse Nasionale Weermag (SANW), in Eskia Mphahlele-rylaan in Pretoria, in die rigting van die R80 gery toe hulle glo deur ’n donker BMW-sportnutsvoertuig met ‘n flitsende blou lig genader is.
Die egpaar het daarna op die R80 in die rigting van Mabopane gery, waar hulle glo gedwing is om langs die pad stil te hou. Die beskuldigdes het na bewering uit die voertuig geklim, een gewapen met ’n R5-geweer en die egpaar oor ’n vermiste agternommerplaat gevra. Volgens die staat het die oorledene die beamptes na die BMW gevolg om hulle identifikasie te verifieer en vas te stel of hulle wetlike mag gehad het om hom voor te keer. Hy is glo in die kop geskiet en is op die toneel dood.
Die twee beskuldigdes het hulself enkele ure later by die Hercules-polisiestasie oorgegee en beweer dat hulle slagoffers van ’n poging tot kaping was. Die saak is vir ‘n formele borgtogaansoek tot 4 Februarie uitgestel.
