GAUTENG. – Ponatsego Anna Ngwenya (45) van Soshanguve het glo kliënte van Roal Funerals se begrafnispolis-betalings in haar persoonlike bankrekening laat inbetaal, in plaas van in die maatskappy se rekening. Sy word van bedrog ten bedrae van meer as R500 000 aangekla en is op borg van R30 000 vrygelaat.
Volgens Lumka Mahanjana, NVG-woordvoerder, word daar beweer dat Ngwenya die kliënte opdrag gegee het om betalings direk aan haar te maak. In sommige gevalle het sy na bewering self kontant by kliënte gaan invorder en beweer dat die maatskappy se betaalstelsel van lyn af was. Die saak het aan die lig gekom toe Royal Funerals agtergekom het dat verskeie polisse verval het. Toe die maatskappy sommge betrokke kliënte gekontak het, het hulle verneem dat betalings aan Ngwenya gemaak is en dat dit nooit die maatskappy bereik het nie. Sy is op 15 April in hegtenis geneem, nadat die saak by die polisie aangemeld en ondersoek is.
Ngwenya het op die aanklagte in die Pretoria-landdroshof verskyn. Die saak is vir verdere ondersoek tot 9 Junie uitgestel.
