LIMPOPO. – Robert Stolz (78) is Woensdag 30 April omstreeks 17:15 met ‘n panga op die plaas Harteles, Stoffkraal, tussen Laersdrif en Roossenekal vermoor.
Kol. Malesela Ledwaba het die insident aan Nuusflits bevestig. Die boer is in sy huis aangeval waar hy alleen gebly het. Sy liggaam is eers Donderdagoggend deur ‘n familielid in ‘n plas bloed in die badkamer aangetref. Daar was ‘n lap in sy mond gedruk, hy is met draad vasgebind en het erge sigbare wonde aan sy voorkop gehad.
Ledwaba sê maj.genl. Samuel Manala, die waarnemende provinsiale kommissaris van Limpopo, het opdrag gegee dat die verdagte (s) in die moord aangekeer moet word.
Voorlopige ondersoek dui aan die oorlede boer se blou Chery-motorvoertuig is langs die R555- openbare pad, onderweg na Burgersfort, in die betrokke polisiëringsgebied opgemerk. Die voertuig is later verlate, ongeveer ses kilometer van die misdaadtoneel af gekry, waar dit omgeslaan het.
Enigiemand met relevante inligting word gevra om sers Millicdent Mokgomogane by 076 614 0141 te bel.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
