KWAZULU-NATAL. – Die liggaam van ‘n man (71), wat vermoedelik die moordslagoffer na ‘n kaping in die ILembe-gebied was, is gekry nadat dit in die Mvotirivier gegooi is.
IPSS Search & Rescue sê Maphumulo-polisie het verdagtes vir die insident na ‘n ondersoek gearresteer. Lede van Umhlali SAPD K9, Durban-polisie en IPSS se soek-en-reddingseenhede het drie dae lank met behulp van hommeltuie, honde en ander toerusting na die liggaam gesoek.
Woensdagaand het die verdagtes glo die plek in die rivier uitgewys waar die oorledene se liggaam ingegooi is. Die soekspanne kon dus Donderdagoggend terugkeer en die polisiehond K-9 Zeus kon ‘n area uitwys nadat 4 km in die rivier afgelê is, waar die man se liggaam gekry is.
Nog 2 km moes stroomaf in die rivier afgelê word sodat die liggaam aan die plaaslike polisie oorhandig kon word.
