NOORD-KAAP. – ‘n Man (61) en ‘n tienermeisie (16) het vandag (Donderdag) in ‘n ongeluk tussen ‘n vragmotor en ligte motorvoertuig op die N1 buite Richmond gesterf. Die polisie ondersoek ‘n saak van strafbare manslag.
‘n Vrou (58) en ‘n seun (10), asook die vragmotorbestuurder (53), is in ‘n kritieke, maar stabiele toestand na De Aar-hospitaal vervoer.
Sers. Timothy Sam sê voorlopige ondersoek dui aan die vragmotor het van Hanover/Richmond se rigting gery. Die vragmotorbestuurder het glo gesien hoe die ligte motorvoertuig uit sy baan swenk voor dit met die aankomende vragmotor gebots het.
Sam vra motoriste om padverkeersreëls te gehoorsaam, waaksaam te bly en nie moeg te bestuur of hulle aandag te laat aftrek nie.
