KWAZULU-NATAL. – ‘n Bejaarde inwoner (69) van Tongaat het Dinsdagmiddag ‘n Malawiese burger (27) tydens ‘n beweerde roof by ‘n algemene handelaar in Maidstone in die bors geskiet.
Reaction Unit South African sê die bejaarde het by die winkel aangekom waar hy gesien het hoe drie mans met vuurwapens glo die plek beroof. Die bejaarde het sy vuurwapen uitgehaal en een van die verdagtes in die bors geskiet. Die verdagte het sy vuurwapen op die plek laat val en met gesteelde kontant en selfone van die toneel gevlug.
Reaksiebeamptes het omstreeks 17:20 opgedaag en gesien die verdagte se vuurwapen is ‘n replika. Die beamptes is daarna na die Tongaat-kliniek waar hulle ingelig is ‘n man met ‘n skietwond is deur insittendes van ‘n wit Ford Bantam-bakkie buite die kliniek gelos.
Tydens ondervraging het die gewonde man eers vertel hy is self beroof, maar het later erken hy en makkers het die winkel beroof. Hy het nie verder inligting gegee nie.
Die verdagte is bewaak totdat Tongaat-polisielede opgedaag het.
