GAUTENG. – Martha Christina (67), wat aangekla is van strafbare manslag en versuim om by ‘n ongelukstoneel stil te hou, is deur die Germiston-landdroshof op borgtog van R5 000 vrygelaat. Thando Pretty Mahlangu (13) is op 28 Junie in Dinwiddie, Germiston, deur ‘n voertuig getref en het later aan haar beserings gesterf.
Phindi Mjonondwane, NVG-woordvoerder, sê in ‘n verklaring die beskuldigde het na bewering met haar voertuig in ‘n skare mense ingery. Onder die groep was jong meisies wat aan ‘n tradisionele inwydingsritueel deelgeneem het. Christina het na bewering nie nie by die toneel stilgehou nie en onmiddellik ná die botsing weggejaag.
As deel van haar borgvoorwaardes mag Christina nie die Gauteng-provinsie verlaat sonder om die ondersoekbeampte in die saak in kennis te stel nie. Die saak is vir verdere ondersoek tot 20 Augustus uitgestel.
