INTERNASIONAAL. – België is die eerste land ter wêreld wat ‘n wet geskep het wat verskeie arbeidsvoordele vir sekswerkers insluit. Die wet beskerm sekswerkers soos enige ander werknemers.
Die voordele sluit onder meer werknemerkontrakte, gesondheidsversekering, pensioenvoordele, kraamverlof en siekverlof in. Werkruimtes moet met alarmknoppies en stortgeriewe toegerus wees. Sekswerkers kan sessies weier of op enige gegewe tyd stop.
Die wet sal keer dat sekswerkers mishandel en uitgebuit word. Die werkers het nou wetlike regte en kan nie afgedank word omdat hulle hulle regte uitoefen nie.
Terwyl die wet wat Sondag in werking getree het, deur sekere feministiese groepe gekritiseer is, het die Belgiese Unie vir Sekswerkers die wet as ‘n groot stap beskou om diskriminasie teen sekswerkers te beëindig. Die Council of Francophone Women of Belgium het die wet as katastrofies vir jong meisies en slagoffers van mensehandel in die geveg teen seksistiese geweld beskryf.
Bronne: The Guardian, CBC, BBC en New York Times
