WES-KAAP. – ‘n Kontantbeloning is uitgeloof vir die opspoor van Siyabonga Kholakele (29) en Yanele Mangweni (32), wat op aanklag van moord op ‘n vrou (64) in Kraaifontein gesoek word.
Lt.-kol. Malcolm Pojie het bevestig die ministerie van polisie het ‘n kontantbeloning van tot R100 000 aangekondig vir inligting wat tot hul arrestasie en suksesvolle skuldigbevinding sal lei.
Pojie sê die slagoffer is op Dinsdag 20 Augustus omstreeks 19:30 op die hoek van Maroela- en Ntongbinistraat in Wallacedene doodgeskiet.
“Voorlopige inligting wat bekom is, het aan die lig gebring die verdagtes het die slagoffer genader onder die voorwendsel om vleis by haar te koop. Hulle het die slagoffer na bewering tot in haar shack gevolg waar sy in die kop geskiet is.”
Die verdagtes het sedertdien arrestasie ontduik. Die polisie versoek dat enigiemand met enige inligting wat tot hul opsporing kan lei, dringend na vore kom.
