KWAZULU-NATAL. – ‘n Bergfietsryer is Woensdagoggend ernstig beseer nadat hy kop eerste in ‘n stroom ingery het.
Midlands EMS in Howick en gevorderde lewensondersteunende paramedici is na die ongeluk in die Karkloof-area ontbied.
Die beseerde bergfietsryer het verskeie frakture gehad en was in die water totdat sy mede-ryers by hom kon uitkom en hom uit die water kon haal.
“Met aankoms is gevind dat die fietsryer in ‘n kritieke toestand was, wat dringende gevorderde lewensondersteuningsbehandeling benodig het.”
Midlands EMS sê gespesialiseerde reddingstoerusting is gebruik om hom te stabiliseer voordat hy vir verdere behandeling na ‘n Vlak 1-traumahospitaal vervoer is.
