DANIËLSKUIL, NOORD-KAAP. – Vyf mense is Maandagaand dood toe die motor waarin hulle was met ’n vragmotor op die R31 tussen Koopmansfontein en Daniëlskuil gebots het. Die pad is bekend vir talle ongelukke die afgelope paar jaar.
Volgens die SAPD het die ongeluk omstreeks 16:45 gebeur toe ’n silwer VW Polo en ’n vragmotor reg van voor teen mekaar gebots het. Die Polo het in ’n sloot langs die pad afgerol.
Al vyf manlike insittendes van die Polo is noodlottig beseer, maar die vragmotorbestuurder is ongedeerd.
Lt.kol. Sergio Kok sê die pad is eers om 21:30 Maandagaand weer vir padgebruikers oopgemaak. ’n Saak van strafbare manslag word ondersoek.
Bronne: SAPD, Kalahari Memorandum Digital
