GQEBERHA. – Jeanine Lewis, wat verlede Sondag in ‘n ongeluk beseer is, moet nou haar seun Aden (12), wat in dieselfde ongeluk gesterf het, se begrafnis of gedenkdiens reël.
Lewis was vroegoggend, omstreeks 01:15, in Hoofweg, Walmer, 200 m van hulle huis, in ‘n tromp-op botsing.
Kapt. Sandra Janse van Rensburg sê twee voertuie, ‘n Kia Rio en VW Caddy, was in die botsing in Hoofweg tussen 10de en 11de Laan betrokke. Die bestuurder was al insittende van die Kia, terwyl Jeanine en Aden in die VW was. Aden is met aankoms by die hospitaal dood verklaar terwyl sy ma in ‘n kritieke toestand opgeneem is.
Die bestuurder van die Kia is ook met beserings na die hospitaal geneem en sy bloed is getrek.
“Hy is op aanklag van strafbare manslag en dronkbestuur in hegtenis geneem.”
Die ondersoek duur voort.
“Aden was ‘n lewendige, vreugdevolle seun wie se lag die donkerste kamer kon verlig. Sy drome was groot, en sy hart was vol liefde. Met sy aansteeklike giggel tot sy grenslose nuuskierigheid het Aden die lewens van almal wat hom geken het, aangeraak. Hy was nie net ‘n seun nie, maar ‘n baken van vreugde en hoop vir Jeanine, wie se wêreld nou ondraaglik leeg voel sonder hom.”
‘n Skarebefondsing BackaBuddy-profiel is deur Tania Behr geskep om Lewis by te staan. Michael Grobler het in ‘n sosialemediaplasing op die FreeState Cheetahs Supporters and Rugby Facebook-blad hulp vir haar gevra.
Lewis is die Maandagoggend uit die hospitaal ontslaan. Terwyl sy in die hospitaal was, is X-strale geneem en CT- en MRI-skanderings gedoen. Volgens Behr het Lewis ‘n stabiele pelvisfraktuur opgedoen.
Behr sê Lewis het egter Dinsdag van moeilikheid om asem te haal, borskaspyn en swaarheid op haar bors gekla. ‘n Dokter het aangebied om haar te spreek en ‘n volledige ondersoek, waartydens nog X-strale geneem is, het gevolg.
“Wonde is skoongemaak en verbind en glas is van haar hare en kop verwyder. Die dokter het vloeistof, moontlik bloed, en lug in haar borsholte gevind. Dit het haar long laat platval. Die X-straal van Jeanine se linkerhand het ‘n vingerfraktuur aan die lig gebring en sal moontlik later ‘n operasie nodig hê. Haar enkel is geswel en gekneus, maar niks is gebreek nie,” verduidelik Behr.
Die dokter het voorgestel bloed moet uit die borsholte dreineer word sodat die long weer kan uitsit.
Hulp is vir Aden se begrafnis of gedenkdiens en sal ook aangewend word om sy ma by te staan, aangesien sy vir ‘n ruk nie sal kan werk nie. Aden se liggaam is in die sorg van ‘n begranisondernemer totdat Lewis weet wat sy wil doen.
“Die verlies is ondenkbaar, en terwyl Jeanine worstel met die diep hartseer van die verlies van haar kosbare kind, staan sy voor nog ‘n uitdaging: die onverwagte en oorweldigende begrafnisuitgawes, sowel as mediese uitgawes vir haarself – vir nou en vir die onvoorsiene toekoms.”
Lees meer op die BackaBuddy-profiel hier.
“Namens Jeanine wil ons graag ons opregte dank uitspreek vir ondersteuning en vrygewigheid wat ons ontvang het. Dankie vir diegene wat saam met Jeanine staan en vir die positiewe impak wat gemaak is. Ons is trots om deel te wees van so ‘n omgee-gemeenskap.”
