LIMPOPO. – ‘n Besending onwettige springstof ter waarde van R2 m. is Dinsdag in ‘n voertuig in die Makhado-polisiëringsarea (Louis Trichardt) in die besit van twee buitelanders onderskep.
Kol. Malesela Ledwaba sê die groot deurbraak is te danke aan Vhembe-blitspatrolliebeamptes wat die voertuig op die N1 in ‘n suidelike rigting, buite Makhado onderweg na Polokwane (Pietersburg), opgemerk en takties gestop het. Vier sakke met Super Power 90 Gel Tubes is in die kattebak ontdek.
‘n Arrestasie is op die bestuurder en sy passasier uitgevoer en die springstofeenheid is ontbied, wat bevestig het dit is kommersiële springstof. Die voertuig is ook gekonfiskeer as deel van die ondersoek om die oorsprong en bestemming van die springstof vas te stel.
Die verdagtes verskyn vandag op aanklagte van die besit van owettige springstof in die Makhado-landdroshof.
