GAUTENG. – Jaén-Lee Pyne (30) van Heidelberg is deur die plaaslike landdroshof op aanklagte van moord met voorbedagte rade op Etienne du Preez en poging tot moord op Flip Minnaar borg geweier.
Lumka Mahanjana, woordvoerder vir die NVG, sê Du Preez en Minnaar, beide by die plaaslike GPF betrokke, het op 3 Julie ‘n restaurant verlaat. Pyne het hulle glo op ‘n motorfiets genader en op hulle geskiet. Beide is in die kop geskiet en is na ‘n hospitaal vervoer waar Du Preez beswyk het. Pyne het homself agt dae later aan die polisie oorhandig.
Pyne het deur regsverteenwoordiging aansoek gedoen vir borg, omdat hy sy gesin moet onderhou en sy besigheid moet bedryf.
Kuthelani Peter Mndanganeni, die staatsaaklaer in die saak, het voorgehou dit is normale omstandighede en het die borg teengestaan. Mndanganeni het die hof herinner Pyne het ‘n saak van aanranding met die doel om ernstig te beseer teen hom uitstaande en voorts gesê die erns van die saak moet in ag geneem word, aangesien Pyne sy verhoor sal ontduik indien hy borg kry.
Landdros Gerhard Strydom het saamgestem en die aansoek om borg geweier.
Die saak is vir verdere ondersoek tot 5 September uitgestel terwyl Pyne in aanhouding sal bly.
