GAUTENG. – Michael Lomas is deur die Johannesburg-hooggeregshof met streng voorwaardes op borg vrygelaat. Lomas staan tereg op 65 aanklagte van Eskom-korrupsie.
Henry Mamothame, woordvoerder van die ondersoekdirektoraat teen korrupsie (IDAC) van die NVG, sê die hof het beveel Lomas moet sy VK-paspoort en sy SA-identiteitsdokument aan die ondersoekbeampte in die saak oorhandig. Lomas mag voorts nie vir reisdokumente aansoek doen nie en moet in ‘n versorgingshuis woon waar hy die nodige hulp sal ontvang. Die versorgingshuis se naam moet aan die ondersoekbeampte verskaf word en sy ligging met behulp van ‘n slimfoon gemonitor word. Lomas mag ook nie Gauteng sonder die ondersoekbeampte se wete verlaat nie.
Lomas is gedurende September 2024 van die VK op 65 aanklagte van Eskom-korrupsie aan Suid-Afrika uitgelewer. Hy en 11 ander beskuldigdes, wat voormalige uitvoerende beamptes van Eskom en direkteure van Tibular Construction Project insluit, staan op die aanklagte tereg. Die batebeslagleggingseenheid (AFU) is ‘n beperkingsbevel van ongeveer R1.4 mjd. teen die beskuldigdes se bates toegestaan.
