MPUMALANGA. – ‘n Beweerde leningsbedrog-sindikaat wat in Hazyview en moontlik ook ander gebiede aktief was, is deur die provinsiële kommersiële misdaadeenheid ontbloot. Nege verdagtes is tussen 24 en 25 Februarie in hegtenis geneem.
Kapt. Mpho Nonyane-Mpe, polisiewoordvoerder, sê die verdagtes – Samukelo Ngomane (26), Julia Zodwa Sebitane (46), Ntombifuthi Setlhabela (34), Nelisiwe Promise Khoza (37), Promise Nelisiwe Mokoena (41), Thobile Pride Mkhatshwa (50), Gertrude Nyakwambe Khoza (55), Princess Beatrice Bobbert (39) en Bongiwe Precious Sumbana (34) – is op verskeie plekke in die provinsie, insluitend Acornhoek, Hazyview, Nelspruit en Schoemansdal, in hegtenis geneem. Volgens voorlopige ondersoek het hulle na bewering lenings en kredietkaarte met vals dokumentasie ter waarde van meer as R500 000 aangevra.
Die verdagtes het Donderdag in die Masoyi-landdroshof verskyn, waar borgtog van R1 000 elk toegestaan is en die saak tot 18 Maart uitgestel is. Die polisie sluit nie moontlikheid van verdere inhegtenisnemings uit nie en die ondersoek duur voort.
