OOS-KAAP. – Botwelethu (7) en Iviwe (3) Zakumba het Maandag in ‘n reservoir in Kwanobuhle, naby KwaMashu, verdrink.
Kapt. Sandra Janse van Rensburg sê lede van die gemeenskap het omstreeks 18:30 hulpkrete op die hoek van 10de en 1ste Laan gehoor. Met die pa en nog mense se aankoms by die reservoir is Iviwe gevind en deur sy pa na die Laetitia Bam-hospitaal gehaas, maar hy is met aankoms dood verklaar.
Botwelethu was glo in die gat langs die reservoir waar herstelwerk ‘n tyd gelede gedoen is en tans met water gevul is. Polisieduikers het haar liggaam uit die gat gehaal.
‘n Geregtelike doodsondersoek is geopen. Die ondersoek deur Kwanobuhle-speurders duur voort.
