Met sterre wat skitter, toesprake wat harte roer en verhoogoptredes waaroor daar vir lank gepraat sal word, het Bok Radio hulle jaarlikse Bokkie Toekennings vir 2025 by die ikoniese Grand West Arena in Kaapstad aangebied.
Hierdie spoggeleentheid het weereens bewys waarom dit as ‘n hoogtepunt op die Afrikaans musiek-kalender beskou word. Die aand het eer gebring aan die grootste name en vars talent in die Afrikaanse musiek- en uitsaaiwese, met emosionele toesprake, verrassingsoptredes en kragtige ballades.
Die Grand West Arena, bekend vir sy wêreldklas akoestiese en energieke atmosfeer, was die ideale verhoog vir ‘n aand van eerbewyse, musiek en viering. Bok Radio, wat diep gewortel is in die Afrikaanse gemeenskap, het weereens bewys waarom dit die “beter alternatief” is.
Die wenners skitter
Die aand het afgeskop met die aankondiging van Hoërskool Bellville as Matriekgroep van die Jaar, wat die atmosfeer gevestig het vir ‘n fees van erkenning en inspirasie.
Een van die mees aangrypende oomblikke van die aand was die onverwagse toekenning van Lewenslange Bydrae tot Afrikaans aan die geliefde Juanita du Plessis, wat ‘n medley van haar bekendste treffers uitgevoer het – ‘n oomblik wat die gehoor op hul voete gehad het.
Brendan Peyper en Demi Lee Moore is onderskeidelik as Manlike en Vroulike Kunstenaar van die Jaar aangewys.
Brandon Miles is bekroon as Nuweling van die Jaar, terwyl Blackbyrd nie net die Groep van die Jaar-toekenning huis toe geneem het nie, maar ook die gehoor met ‘n kragtige ballade laat skree het van opwinding. Dit was een van die absolute hoogtepunte van die aand.
Die Liedjie van die Jaar, “Country is for Me” deur Appel ft. Australiese country sanger James Johnston, het internasionale flair na die verhoog gebring. James Johnston se uitvoering het die gehoor betower. Net toe almal gedink het die aand kan nie beter raak nie, het Early B hom op die verhoog aangesluit vir ‘n spontane duet. Dié verrassingsoomblik het die gehoor laat juig en die aand in styl afgesluit, ‘n ware viering van Afrikaans musiek en radio toekennings-gees.
En die wenner is…
Die Musiekvideo van die Jaar is toegeken aan Eloff en Early B, vir hulle vrolike somer-treffer Bikini Weer. Tayla Venter is as Blerbokkie van die Jaar aangewys en die Omroeper van die Jaar, Le-Lue van der Sandt, het harte gewen toe sy haar dogtertjie saam op die verhoog gebring het.
Die gerespekteerde Wimpie van der Sandt is vereer vir 30 jaar se diens in die radiobedryf en Louis van den Berg het die spesiale Bokkie Toekenning ontvang vir sy bydrae tot die Bok-span.
Bekendes, optredes en verhoogflikkers
Die ikoniese akteurs Liz Meiring en Hannes van Wyk, geliefd vir hul onderskeidelike bydrae tot Afrikaanse film en televisie, het die aand geanker as seremoniemeesters. Hul gesoute teenwoordigheid en spitsvondige humor het die geleentheid met warmte en elegansie afgerond.
Musieklegende Anton Goosen het ‘n tydlose akoestiese vertoning gelewer, terwyl die energieke optrede van James Johnston saam met Early B beslis as een van die groot hoogtepunte van die aand uitstaan.
‘n Toekenningsaand om te onthou.
Die Afrikaans musiek en radio toekennings by Grand West het nie net talent gevier nie, maar ook die unieke kultuur en gemeenskap wat dit dra. Bok Radio het weer bewys hoekom hulle die hartklop van Afrikaanse musiek en omroep is.
Met ‘n perfekte kombinasie van nostalgie, nuwigheid en trots, het die Bokkie Toekennings 2025 ‘n goue standaard vir komende jare gestel.
Besoek Bok Radio se webwerf of volg hulle op Facebook vir foto’s en agter-die-skerms oomblikke van die aand.
