GAUTENG. – Vuyokazi Toko (43) en Elisa Shikwambana (45), twee van vyf verdagtes, is deur die Kempton Park-landdroshof borgtog van R15 000 elk in ‘n dwelmhandelsaak toegestaan.
Magaboke Mohlatlole, NVG-woordvoerder, sê die beskuldigdes moet ingevolge hul borgvoorwaardes gereeld by hul naaste polisiekantoor aanmeld. Volgens die staat is die twee tesame deur die polisie en lughawensmaatskappy van Suid-Afrika by OR Tambo Internasionale Lughawe in hegtenis geneem. Dwelms met ’n straatwaarde van meer as R5 miljoen was glo aan hul liggame versteek. Hulle was op pad na China deur Dubai toe hulle vasgetrek is.
Die saak is vir verdere ondersoek tot 4 Augustus uitgestel. Die oorblywende beskuldigdes se borgtogaansoeke sal op 14 en 15 April aangehoor word.
