GAUTENG. – Vyf beweerde vroue-dwelmmuile van Suid-Afrikaanse afkoms is Saterdag op OR Tambo Internasionale Lughawe in hegtenis geneem nadat owerhede dwelms met ’n geskatte waarde van meer as R5 miljoen aan hulle versteek gevind het.
Lt.kol. Amanda van Wyk, nasionale polisiewoordvoerder, sê die vroue is tydens ’n gesamentlike operasie saam met die lughawemaatskappy (Acsa) vasgetrek. Die verdagtes was glo onderweg na Dubai op pad na China. Tydens deursoeking is die dwelms op verskeie plekke aan hul liggame gevind, insluitend in hul skoene en onderklere. Die vyf vroue sal na verwagting Dinsdag in die Kempton Park-landdroshof verskyn op aanklagte wat met dwelmhandel verband hou.
Die polisie se ondersoek duur voort.
