LONDEN. – Claire Bridger (64) wat van poging tot moord in die hof verskyn het, is deur die Norwich Crown Court skuldig bevind nadat sy haar vervreemde man, Keith Bridger, met ‘n skerp voorwerp in die bors en maag gesteek het. Sy het hom gesteek nadat sy uitgevind het dat hy hulle twee geliefde dachshunds laat uitsit het.
Die voorval het op 17 Julie 2025 plaasgevind toe Bridger, ’n geregistreerde skoolverpleegster, haar vervreemde man, met wie sy reeds 40 jaar getroud was, in sy Norfolk-huis gekonfronteer het. Die paar was omtrent ’n jaar vervreem en die honde, wat hulle as gesamentlike troeteldiere aangeneem het, was by Keith in sy sorg toe hy besluit het om hulle van kant te laat maak.
Bridger het in die hof getuig dat sy in die maande voor die aanval gesukkel het om die skeiding te hanteer. Medikasie is aan haar voorgeskryf en sy het tyd van haar werk afgeneem. Toe sy hoor die honde is uitgesit, sê sy, het sy “rooi gesien.” Die ma van twee het voorts gesê sy het nie beplan om haar vervreemde man dood te maak nie, maar dat sy hom wel skade wou aandoen. Keith is met lewensbedreigende beserings na ‘n hospitaal geneem.
Na ’n vyf dae lange verhoor het die jurie haar skuldig bevind aan besering met voorneme om skade te berokken, maar nie aan poging tot moord nie. Sy sal op 20 Maart gevonnis word.
Bronne: Sky News, NDTV, New York Post
