LIMPOPO. – ‘n Verdagte (40) is Dinsdagoggend omstreeks 10:00 op beskuldiging vir die besit van vermoedelik gesteelde eiendom ter waarde van duisende rande by sy huurwoning in Bela-Bela (Warmbad) gearresteer.
Kol. Malesela Ledwaba sê inligting oor die verdagte wat vermoedelik gesteelde eiendom in twee kamers in Khotastraat gebêre het, is opgevolg. Met aankoms by die huis het hulle die verdagte daar aangetref. Tydens deursoeking het die polisie verskeie elektriese toestelle, insluitend televisiestelle, mikrogolfoonde, selfone, klere, skoene, fietse, wasmasjiene en ander huishoudelike items, gevind. Die verdagte kon nie ‘n behoorlike verduideliking oor die items gee nie en is onmiddellik in hegtenis geneem.
Van die gesteelde eiendom is op die toneel deur die eienaars uitgeken. Die verdagte sal binnekort op die klag van die besit van gesteelde eiendom in die Bela-Bela-landdroshof voorkom.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
