WES-KAAP. – Stanislav Stamenov (41), ook bekend as Stanislav Sevdanilov, ‘n Bulgaar wat deur Roemeense owerhede gesoek word, is soos voorheen berig Vrydagoggend in Constantia in hegtenis geneem. Hy het Maandag oor sy uitlewering in die Wynberg-landdroshof voorgekom. Die saak kom weer Woensdag voor wanneer ‘n landdros uitspraak sal lewer oor ‘n voorlegging wat sy regsverteenwoordiger, William Booth, oor sy inhegtenisneming gemaak het.
Eric Ntabazalila, NVG-woordvoerder, sê in ‘n verklaring die voortvlugtige is op ’n Interpol rooi kennisgewing deur beamptes van die polisie se nasionale intervensie- en misdaadintelligensie-eenhede vasgetrek. Brig. Athlenda Mathe, nasionale polisiewoordvoerder, sê in ‘n verklaring Stamenov is gedurende 2009 in Roemenië vir dwelmhandel gevonnis, maar het kort daarna gevlug. Hy was glo deel van ’n georganiseerde misdaadgroep wat heroïen na Roemenië gesmokkel het. Volgens owerhede het hy hom vir etlike jare in Kaapstad skuilgehou en as ’n gimnasiuminstrukteur by verskeie bekende fiksheidsklubs gewerk. Hy is op Interpol se rooilys gesirkuleer, wat wêreldwyd versoek dat wetstoepassingsagentskappe help om ’n voortvlugtige op te spoor en aan te keer.
