POTCHEFSTROOM, NOORDWES. – Die Noordwes-Universiteit het bewerings dat Christenskap op die Potchefstroomkampus verbied word, ontken.
Dit volg na ’n stemnota wat verlede Donderdag op Whatsapp deur ’n beweerde student genaamd Mira rondgestuur is waarin sy beweer alle gelowe behalwe Christenskap op kampus mag uitgeleef word.
In die stemnota vra sy die gemeenskap om te bid omdat sy glo nuus gekry het oor bid in koshuiskamers wat voortaan verbied word en oor koshuise wat ook nie meer aanbiddingsgeleenthede mag hou nie.
Die universiteit het in ’n vroeëre verklaring bevestig hulle veroordeel enige aksies waar studente se basiese regte van vrye assosiasie te na gekom word.
Bronne: Potchefstroom Herald, NWU, Facebook
