KWAZULU-NATAL. – Moira Harding, wat Sondag vermis geraak het nadat sy die Comrades marathon voltooi het, is vanoggend (Maandag) in ‘n kritieke toestand opgespoor. Sy is met ‘n Netcare911-lugambulans na ‘n hospitaal gevlieg.
Garrith Jamieson van ALS Paramedics sê dié diens was vanoggend by die NSRI se basis in Pointstraat waar gevorderde lewensondersteunende paramedici vir Harding behandel het. Nadat sy vermis geraak het, is ‘n grootskaalse soektog deur verskeie rolspelers van stapel gestuur. Harding is naby die NSRI-basis aan die kant van ‘n pier (‘n jetty) in die sentrale gebied van Durban aangetref.
Lt.kol. Robert Netshiunda sê aan Nuusflits die omstandighede word ondersoek waartydens Harding vermis geraak het. “Die vrou is tans in die hospitaal. Hoewel daar geen sigbare beserings was nie, sal die polisie die mediese verslag afwag wat hul volgende stappe sal bepaal.”
Geen verdere inligting is tans beskikbaar nie.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
