Die DA gaan die parlementêre portefeuljekomitee oor gesondheid vra om dr. Aaron Motsoaledi, minister van gesondheid, weer te ontbied om vrae oor twee bemarkingskontrakte te beantwoord wat met die Nasionale Gesondheidsversekering (NGV) verband hou. Volgens die DA beloop die uitgawes aan die kontrakte saam sowat R182 miljoen.
Michele Clarke, die DA se woordvoerder oor gesondheid, het Dinsdag gesê die party wil weet wie die kontrakte goedgekeur het en watter kontroles die departement vooraf gedoen het. Volgens die DA was die maatskappy wat die NGV-bemarkingskontrak van sowat R35 miljoen gekry het, glo reeds in likwidasie toe die departement dit toegeken het. Die tweede kontrak, van sowat R146 miljoen, het bemarking vir die NGV, gesondheid en welstand gedek. Clarke sê die departement het albei kontrakte tydens dr. Joe Phaahla se ampstermyn as minister toegeken, sowat ’n maand voordat Motsoaledi na die pos teruggekeer het.
Die komitee het reeds in Oktober ’n voorlegging van Motsoaledi en departementele amptenare oor die NGV-advertensietender ontvang. Volgens die parlement se verklaring van 10 Oktober het die komitee gedetailleerde rekords oor die verkryging, bestuur en uitgawes aangevra. Motsoaledi en Phaahla het die mediaberigte oor die tender na die Spesiale Ondersoekeenheid (SOE) verwys.