WES-KAAP. – Altesaam 96 varke is deur Die Kaap die Goeie Hoop-DBV, met die ondersteuning van die Stad Kaapstad en die SAPD van ’n eiendom in Sir Lowry’s-pas verwyder nadat ‘n hofbevel verkry is.
Volgens die DBV het inspekteurs sedert Mei herhaaldelik met die eienaars gewerk, waarskuwings uitgereik en riglyne gegee om die diere se leefomstandighede te verbeter. Volgens die organisasie het die toestande verder versleg, met varke wat met reën in modder en mis vasgekeer was en soms sonder skoon water gevind is. ’n Inspekteur het gesê: “Sommige diere het aan onbehandelde mediese toestande gely. Dit is direkte oortredings van die wet.”
Die Somerset-Wes-landdroshof is deur die DBV vir ’n lasbrief ingevolge die Wet op Dierebeskerming 71 van 1962 genader, wat beslaglegging goedgekeur het. Die operasie is onder toesig van die owerhede uitgevoer.
Al 96 varke is na die DBV se plaaswerf geneem, waar hulle nou veeartsenykundige sorg, skuiling en skoon water ontvang. Die saak word ondersoek en die eienaars kan moontlik aangekla word.
Druk hier om meer te lees.
