KWAZULU-NATAL. – Die departement van landbou het ’n waarskuwing aan vakansiegangers oor ’n uitbraak van hondsdolheid in die kusgebied van KZN en die Oos-Kaap uitgereik.
Hondsdolheid is ’n virale infeksie wat deur middel van speeksel van geïnfekteerde diere oorgedra word. Die siekte kan dodelik wees. Dit kan ook oorgedra word wanneer ’n geïnfekteerde dier ’n mens byt, krap of lek.
Aanvanklike simptome is soortgelyk aan griepsimptome. Dit sluit swakheid, moegheid, hoofpyn en koors in.
Reggie Ngcobo, woordvoerder van die departement van landbou, het klem op die belangrikheid van waaksaamheid gelê. Hy het die publiek gewaarsku om nie rondeloperkatte of -honde in hierdie areas op te tel nie, maar eerder hulle plaaslike dierebeskermingsowerheid te kontak. Verder waarsku hy dat voorvalle van hondsdolheid op enige plek in Suid-Afrika kan voorkom.
Bronne: SABC, Times Live, DOA
