VRYSTAAT. – ‘n Plaaseienaar (62), sy vrou (60) en dogter is op 19 Augustus op ‘n plaas in Bloemspruit aangeval. Die egpaar is beseer en na ‘n hospitaal geneem.
Kapt. Loraine Earle het bevestig dat die polisie ’n deurbraak in die huisroofondersoek gemaak het met die inhegtenisneming van ’n 37-jarige buitelander in Qwaqwa se Makwane-woonbuurt. Die man is gearresteer nadat die polisie inligting ontvang het oor ’n ongelisensieerde vuurwapen.
“Die polisie het vanoggend ‘n man met ‘n ongelisensieerde vuurwapen en ammunisie gevind. Met verdere ondersoek het hulle ook huishoudelike en persoonlike items gevind, wat aan die slagoffers van ‘n huisroof op die plaas Eensgevonding in Meadows, Bloemspruit, behoort”
Die voorval het omstreeks middernag plaasgevind toe die plaaseienaar se alarm beweging opgetel het. Hy het ‘n waarskuwingskoot geskiet en was op pad na sy werknemers toe hy gewapende mans teëgekom het wat hom ontwapen en geskiet het. Hulle het hom na die huis geneem, waar sy vrou en dogter vasgebind was, en die huis geplunder. Die verdagtes het met geld, vuurwapens, huishoudelike items en persoonlike besittings gevlug.
“Beslag is gelê op ‘n 7,65 mm-pistool en ammunisie, asook op van die gesteelde items, wat deur die slagoffers as hulle s’n geïdentifiseer is.”
Die verdagte sal binnekort op aanklag van die besit van ‘n ongelisensieerde vuurwapen en ammunisie en die besit van vermoedelik gesteelde eiendom in die hof verskyn.
